Рекламите се „маркетинг“ за македонските телевизии и интернет портали

Mаркетингот во нашево општествено и бизнис живеење е неправилно разбран и интерпретиран, а за тоа сведочат следниве фотографии (screen shot-ови), како своевиден преседан во нарекување „МАРКЕТИНГ“ на телевизиските реклами, интернет банерите, секциите од интернет страниците за склучување на договор за рекламирање или слични други позиции, секаде кадешто рекламата или огласот „замешуваат прсти“. 


Имено, македонските телевизии (секоја чест на исклучоците) кога треба да емитуваат тв реклами и за тоа ја прекинуваат телевизиската програма, со огромни букви на своите форшпани ни пишуваат М А Р К Е Т И Н Г ! Небаре ќе ни го емитуваат маркетинг миксот на нивните клиенти со производ, цена, дистрибуција и промоција. Наместо краткото и јасно ЕПП (економски пропагандни пораки, ПП - пропагандни пораки) или она обичното безболно РЕКЛАМИ -  тие сакаат нешто понаучно, посериозно, подлабоко, позначајно - МАРКЕТИНГ! ... ЕПП-то коешто до пред некои си десетина години беше испишано на телевизиските екрани, пред нашите менаџери, (а потоа и транзициската општа-јавност) да чујат за пософистициран термин „маркетинг“, стана тотално неправилно исфрлена кратенка, како да е заостанат комунистички остаток од кое што побрзо треба да се исчистиме. Сега се пишува само „маркетинг“ - тоа звучи многу пострански и што е најбитно, покапиталистички! Снобови! 

Интернет банери  - наречени маркетинг!

Страниците за контакт со клиентите околу договар за рекламирањето го нарекуваат маркетинг! Небаре интернет странициве ќе изработуваат маркетинг микс, со претходна анализа на околината, маркетинг истражување, па потоа и маркетинг менаџмент околу миксот!

Истата приказна можеме да ја сретнеме и на веб страните на телевизиите.

Но, од секое „правило“ постои исклучок. Секоја чест за одредени телевизии кои се потковани со соодветни познавања и знаат што треба да напишат на форшпанот кога ги емитуваат рекламите: а тоа е токму тоа - „реклами“!

Порталот mnogoo ќе го истакнам како современа и секогаш внимателена интернет страница, на којашто се води прецизна грижа за ситниците. Кога ја отворив оваа страна не се сомневав дека нема да прочитам „маркетинг“, ни за огласи, ни за секции за договарање околу рекламирање.

За крај, како една потврда за се’ што денеска критикувавме и негодувавме, може да посочиме screen shot од две екстремно познати веб страници (CNN.com - како прв резултат на google доколку напишете „news“ и веб страната на, во изминативе години, највлијателната жена во светот - oprah.com) за компарација што пишуваат овие два вртоглаво - недостигливи медиумски императиви кога се работи за рекламирањето!

CNN - advertise with us (доколку побарате преку ctrl + F никаде нема да го пронајдете терминот „marketing“)

Нa oprah.com огласите се „advertisement“ (наместо македонското толкување - „маркетинг“).

Се надевам дека телевизиите и интернет порталите со тек на време ќе научат дека постојат и „се борат“ за рекламирање - огласување, а не „маркетинг“; заработуваат од рекламите и огласите, а не од „маркетингот“ на клиентите. Но, она што уште посилно се надевам дека конечно маркетингот во нашево општество ќе го достигне она достојно и соодветно ниво, кога најголемиот дел од граѓаните ќе прават разлика помеѓу рекламирање и маркетирање, оглас или маркетинг микс, маркетингшки трик или маркетинг концепт и нема да се случува вакво несоодветно мешање на толку добро разграничени термини.


*Сите screen shot-ови се случајно одбрани, без соодветна тенденција да се истакне, па потоа оцрни некоја веб страница, туку напротив, нивниот избор се базира на фактот дека котираат високо на скалата на свесноста (brand awareness) и скалата на преференциите (brand preference)!
**Сите screen shot-ови на телевизиите се уште повеќе случајни, соодветно на веројатноста на нивно можно регистрирање додека форшаните одат во етер!

***Листата на телевизиски screen shot-ови ќе биде набрзо надополнета.

Прочитај повеќе >>

comments

Под лупа: Реклама за алкохол на „вистинското“ место

Доколку треба да генерализирам и без детални анализи, да констатирам која е главната целна група за конзумација на жестоки алкохолни пијалоци (не земајќи ги во предвид единечните пазари на посебните марки на алкохолни пијалоци) дефинитивно како најголем и најобемен конзуматор на алкохол, во прв ред, (за жал) ги посочувам студентите, а понатаму и средношколците. Оваа констатација нема улога на критика на начинот на живот во денешното општество, со акцент на состојбата на младите луѓе и кои се причините за истата, туку напротив, ќе ја искористам за една маркетинг забелешка или да „отворам еден случај“ за тоа како рекламите на алкохолот секогаш знаат да застанат пред очите на нивниот најголем конзумент - најпосакуван таргет!

Низ моето четиригодишно студирање, речиси секое излегување од портите на универзитетот и мое упатување кон дома, беше „под спонзорство“ на Smirnoff – најпопуларната и (таканаречена) најквалитетна водка, за која моите врсници знаат да кажат „дека е убедливо најдобрата“. Се работи за една незабележителна, но многу влијателна „реклама“ на Smirnoff поставена веднаш спроти главниот влез/излез на комплексот на факултети кај Мавровка, чиј натпис можете да го прочитате штом решите да тргнете по патот кон дома. Секако, не е случајна оваа поставеност, токму, спроти најголемиот универзитетски комплекс, кадешто циркулира, секојдневно влегува и излегува, огромна маса на студенти, бројка која се мери во повеќе илјади. Токму на излезот на таа порта можете да го забележите логото на Smirnoff, кое е многу јасно испишано во далечината, на онаа висина, да може да биде забележано од очите на било кој просечен студент.  

Што мислат младите за Smirnoff? -Таа е најквалитетна водка, малку поскапа, но не претерано скапа за да биде гледана како луксузен недостапен жесток пијалок; водка со најдобар вкус, секогаш пожелна кога има можност дополнително да се плати за да се набави; и како најбитно, водка чие конзумирање не носи последици, односно водка „ослободена“ од мамурлак. Smirnoff е перцепирана како пријател бидејќи од неа никогаш не боли глава, таа е посакувана и ценета, а пиењето на останатите (ценовно слични или ценовно пониски) субститути е проследено со мало негодување. Полн погодок! Вистинскиот производ пред вистиските очи!

Изложеноста пред очите на студентите во овој случај е огромна доколку го земеме во предвид фактот дека еден студент во просек студира околу 4 – 4,5 години, и доколку тоа време го помножиме по (грубо земено – без викенди, лето, испитни сесии и други денови ескивирање од часови) 200 дена/пати (во годината кога излегува на тој излез) е еднакво на 800 пати изложеност скоро секој поединечен студент од многуте илјадници студенти! Солидни БРУТО РЕЈТИНГ ПОЕНИ!

И што? Сигурно голем дел од вас сигурно се прашувате како може тоа да влијае врз зголемувањето на продажбата на Smirnoff на нашиот пазар?! Најпрвин, да разјасниме дека паното навистина не може да влијае кон директно квантитативно зголемување на продажбата или профитот, ниту пак кон подобрување на имиџот на Smirnoff, бидејќи нема некаква анимативна улога. Но, функцијата на оваа „реклама“ не се состои во директно предизвикување зголемена продажба, туку има многу посуптилна, контроверзна и подлабока улога. Иако ова пано е мало парче од мозаикот, сепак тоа е доволно значајно, за туку така да го дискредитираме!

Тоа има улога да ја зголеми визуелната перцепциска свесност за логото на Smirnoff, коешто проекциски се вметнува во свеста на гледачот, за понатаму идентификацијата и препознавањето на истото да биде целосно олеснета и автоматска. Аналогно на тоа, гледачот кој бил изложен неколку стотини пати на логото на овој производ, во остатокот од својот живот ќе има огромна свесност за истото, и каде и да го забележува ќе го перцепира како многупати виден и познат производ – со длабока историја во неговата свест. Со тоа производот станува визуелно близок, достапен и „секојдневен“, како да бил постојано дел од животот на гледачот. И се разбира, кога тој ќе биде соочен со голем избор на слични марки, погодете за која ќе се одлучи (секако доколку останатите елементи од маркетинг миксот се поволни)! Повеќе од тоа не може да посака ниту еден маркетер! 


Се разбира, нашево рекламно пано, можеби, и нема до толку силна и револуционерна улога, но сепак е поставено на правото место и ја има токму целта за која штотуку зборуваме. Па, и да исполни барем половина или третина од ова што денес набројавме, тоа ја извршило својата фунцкијата повеќе од одлично!

......

Да биде оваа маркетинг приказна поинтересна, пред речиси 2,5 години на Smirnoff надворешното рекламно пано, закачено на трговскиот центар Мавровка, му се придружи и неговиот алкохолен колега, господин Johnnie Walker. Сега, овие два најдобри бренда во својата класа на жестоки пијалоци, ја красат Мавровка, висејќи веднаш пред очите на „жедните“ студенти. Коинциденција? 

 Не би рекла!

Прочитај повеќе >>

comments

MILKA и JACOBS во врска, заедно со гратис математичка формула

Milka и Jacobs – совршена комбинација во контрирање на Nescafe и Nestle. Сметам дека се одличен пар, доколку го земеме во предвид фактот дека, нормално, Milka не може да се спои со Nescafe,  иако можеби концепциски совршено би одговарале (Milka е синоним за чоколадо, а Nescafe е ултимативен број 1 кафе бренд). Но, сепак знаеме дека тоа е невозможно да се случи, па затоа, Milka и Jacobs одлично се снашле против својата најлута конкуренција: Milka како лидер на чоко-пазарот може да му помогне на Jacobs да се протне во домовите и суптилно да ја претвори ,,пробата” во лојалност, шармирајќи со својот уникатен имиџ и стил.

Тоа што ми ,,го фати” окото беше  комплицираната гратис понуда во Tinex, со премногу бројки (бидејќи подимето на самиот производ содржи математичка комбинација: 3 во 1 или 2 во 1) – грешка во презентирање од страна на Tinex Маркети.

Сметам дека перцепциски не е коректна оваа комбинација која наликува на сложена математичка формула преку која е тешко веднаш да се воочи што всушност се нуди како гратис производ. Звучи некако вака: две Jacobs ,,три во едно”, осумнаесет грама или ,,две во едно” шеснаесет грама. И дополнитекно, не е познато дали и за ,,две во едно”  од шеснаесет грама се даваат исто така две парчиња гратис?

Како и да е, во случајот кога имаме (под)име на производ со бројки, не треба да усложнуваме со додавање на повеќе бројки, посебно кога имаме ,,или или” ситуација. Треба да се потрудиме да го релативизираме строгиот и концизен математички израз преку (во случајов) сликовитост (иако, за среќа, се потрудиле да го стават логото на Jacobs). Предлагам ова известување да изгледа, на некој начин, вака:

2 х (СЛИКА од Jacobs кесичката на која видно се гледа дека е 3 во 1 – 18г.) ИЛИ 2 х (СЛИКА од Jacobs кесичката на која видно се гледа дека е 2 во 1 – 16г.)

– секако во доволна и видлива големина и разиграност со цел полесно да биде просецуирана во мозокот на читачот (не сите читачи имаат способност лесно да ги обработуваат комбинациите со бројките или воопшто бројки).

Со сликовито претставување на Jacobs кесичката – производот ќе биде повеќе доближен до потрошувачот и речиси на дофат, секако многу повеќе отколку сувоппарните и збунувачки комбинации од бројки. Сепак, да не забораваме дека е истражуваки и емпириски докажано дека 80% од потрошувачите повеќе реагираат на слики - визуелно претставување, отколку текст! А да не зборуваме пак, за бројки! Најверојатно многу мал број можат да „реагираат“ на бројки.

За дополнителен ефект, сметам дека покрај овие Milka сталажи, потребно е да било направено место и за Jacobs катче, со што на потрошувачот добитната гратис-комбинација ќе му биде поблиску до очите, рацете и „потрошувачката кошничка“.

Тргнувајќи од себе, секој би се чудел од каде ќе го добие тој гратис Jacobs, на следнив начин: ќе ми го дадат на каса или сама треба да си го земам?  Ако не си го земам, ќе се срамам ли да го барам доколку и на каса не ми го дадат, како да е последно кафе на светот? Треба ли да ја прашам продавачката од каде ќе го добијам тој Jacobs? Итн итн... 


Зошто дополнително да го усложнуваме купувачкото искуство?

Прочитај повеќе >>

comments

Под лупа: Рекламирање на печки и камини, PLAMEN INTERNATIONAL, сред лето и на погрешен начин

Во моите раце случајно падна оваа реклама - оглас во весник, на ,,Plamen International” собни печки и камини, солидно средена, информативна, рационална. Во поглед на креацијата на огласот немам никакви забелешки, сепак се работи за ,,посебен” производ по своите карактеристики, кој не бара емоционална вклученост, ниту емоционално влијание со цел да се поттикне купување и слично, туку напротив, спредување на доста рационални фактори.

Но, тоа што ме шокираше и што ми го урна мислењето за овој просечен солиден флаер, ме натера да го прогласам за најнерационален ,,рационален” оглас што некогаш го имам видено и да помислам дека огласувачот е ,,надвор од умот“, е фактот што огласов го држев во раце сред лето! Температурата беше неподнослива, на работ да го премине 40-тиот целзиусов степен, животот и нормалното функционирање беа под „знак прашалник“ и се’ што луѓето бараа во тие услови беше ладна климатизирана сенка со многу пониска температура! Во тие неподносливи летни горештини јас во рака држев оглас за зимски печки и камини, од чија асоцијација и помисла добивав уште поголеми телесни мачнини! 

Можеби некој би рекол дека се работи за трик и компанијата сака предвремено да ја зголеми продажбата со многу пониски цени во летниот период, наместо во зимскиот, каде природната побарувачка за нив е  зголемена и аналогно на тоа, зголемени се и цените.

Да, се согласувам! Но, каде е пораката дека е така? Каде е повикот и апелот кој вели ,,дојдете и купете сега кога цените се драстично/дупло/двојно/многу пониски од зимскиот период”?!?! Каде е објаснувањето за ,,дисконтот и колку вие ќе заштедите”? Каде е ,,разликата помеѓу зимската и летна намалена цена”?? Наместо тоа, гледаме чисто зимска (ладна) и регуларна реклама, без никаков нагласок дека се работи за лето и намалени цени, а апелот ,,најдоброто по најповолни цени” ништо не кажува, посебно не дека се работи за ниски летни цени! Напротив, мене ми личи дека цената е иста  бидејќи го купуваш ,,најдоброто”, без разлика на сезоната! Зошто тогаш би се дрзнал некој потрошувач сред летни горештини да набавува зимска печка?!

Да биде трагедијата уште поголема ,,Plamen International” ги рекламира своите печки на почетокот на летото, старт кој гарантира тропски горештини и уште многу месеци пред да се сетиме на ,,ланскиот зимски снег”.

Правилниот момент би бил да се огласува на почеток на септември, кога есента тропа на врата и кога неколкуте пониски степени температура, се чинат како најлута зима! Секако и во овој случај, НЕОПХОДНО е нагласување за дисконтот кој се дава пред сезоната, со што рационалните потрошувачи ќе се мотивираат да размислат/дојдат/го купат овој бренд.

Update: Истиов оглас излегол повторно во ТЕА Модерна, со дата 21 септември. Верувале или не, се работи за истата идентична слика, без никаква промена во текстот, апелите или сликите! Можам да гарантирам дека огласов ќе се појавува цела есен и зима, во определени интервали, без да се промени ни најмалку во својата содржина – со тоа што цените (барем во очите на потрошувачите) ќе останат исти, како во летото така и во зимата!

Измина октомври, поминува и ноември, и токму, тоа и се случува...

Прочитај повеќе >>

comments

ЖАРКО ТРАЈАНОВСКИ со успешен спин ефект во СТУДИО 2 на тема ,,патриоти и предавници”

Во ситуација на драстична партизација на сите аспекти на македонското политичко и секојдневно општествено живеење, дојдовме до степенот на силна поделеност на населението, дури и преку голем број на природни идеологии со различни вредности, за жал спротивставени по својата природа. Па така, одредени вредности како патриотизмот (и светски непопупуларниот) национализам или сакањето и почитувањето на својата држава или пак спротивното - несакањето и непочитувањето на својата држава, и нивното било какво јавно искажување, почна да доведува до поврзување со една или друга партиска „идеологија“. Во сиот тој „Гордиев јазол“, најзаплеткани се најдоа не само партиските членови, туку и медиумите и самите граѓани. Но, целта на овој текст не е дискутирањето на позитивните/негативните причини, последици или пак нивното едноставно констатирање во оваа деликатна општествена ситуација, туку анализа на еден интересен случај, кадешто маркетингот со своите спинови може успешно да влијае врз извртувањето на перцепцијата во своја полза.

Без да навлегуваме во полемики и продлабочувања, а уште помалку да исправаме партиско политизирани ,,криви Дрини”, ќе ги земеме работите здраво за готово, какошто важат во македонската (медиумска) јавност (какошто во овој случај ги декларираше А1 телевизија во дебатната емисија на Студио 2) – поделеност на „патриоти и предавници“.

Во случајот, на страната на ,,патриотите” А1 Телевизија го повика новинарот Миленко Неделковски, а на стрaната на ,,предавниците” Жарко Трајановски, активист за човекови права и колумнист.

Жарко Трајановски, знаејќи дека е повикан како застапник на „лошите дечки“ и на страната којашто во колективната свест е силно перецепирана како најнегативна, на којашто Данте и го одредил место дури во последниот ,,9ти круг на пеколот”, прави еден успешен спин со цел да ги неутрализира негативните перцепции натоварени на неговиот грб.

Господинот Трајановски облекол црвена маичка со македонското знаме, на којашто 

пишува Република Македонија – акт кој во борбата на перцепциите му носи огромна победа! Тоа е типично перцептивно заслепување на јавноста, посебно на оние граѓани кои имаат негативно мислење, поттикнато од неговиот имиџ на „предавник“ и води кон ублажување на негативните емоции кон него. Спинот е толку успешен што дури врши директно сузбивање на сите негативни мислења за Трајановски во улогата на предавник, па дури и уверување во спротивното – дека можеби под површината навистина се работи за вистински патриот!

Прочитај повеќе >>

comments

PORSCHE Македонија со билборд за пофалба!

Билбордов осамна на улиците на Скопје речиси веднаш кога во јавноста се утврди одлуката дека во државава ќе може да се увезуваат возила постари од 10 години. Евидентна беше паниката кај големите автомобилски застапници и салони за продажба на новопроизведени коли, кои почнаа да стравуваат дека ќе изгубат поголем дел од својот (и онака) висок профит.

Креативниов билборд, дело на PUBLICIS (не е на Idea Plus Communications - извинување до Publicis!!!!), на одличен начин ја презентира паниката кај авто-застапниците, кои со брза реакција решија да пробаат да ги предомислат купувачите во купувањето на половни автомобили на новиот, сега, раздвижен „автопазар“.

Стравот и паниката можеме многу лесно да ги почувствуваме токму преку овој мирен, стабилен и „едногласен“ билборд. Оваа реклама кажува многу јасна, прецизна и сериозна порака, на чиста, обична и стабилна позадина  - без визуелно да попречуваат било какви непотребни елемети кои би го одвлекле вниманието од важната порака.

Пораката којашто се испраќа е суптилна, ненападна и содржи визуелен приказ од само два предмета (два различни видови клучеви) кои се, со по една реченица, кратко и прецизно објаснети. Токму во оваа маркетинг тишина можеме да ја видиме „гласноста“ на билбордот и апелот којшто го емитува!

Можеме да истакнеме дека во оваа реклама е комбинирано вијанието од три апели кои сукцесивно се појавуваат:

Најпрвин, суптилно евидентен е апелот на страв, кој се јавува веднаш штом гледачот го сфати „трикот“ на пораката, а потоа се оставени неколку секунди за гледачот да размисли и да ја процесира пораката во својата глава.

Доколку ситуацијата ја набљудуваме во второ лице, психолошката обработка на информациите би била се одвивала на следниов начин: Откако сте го здогледале билбордот и сте ја осетиле „рационалната“ порака на емоционалниот апел на страв, неколку секунди подоцна можете да го осетите и присуството на следниот апел - апелот на гордост. Во овој случај, апелот на гордоста повеќе е насочен кон машката популација, бидејќи билбордов е типично „машки“, произлезен од, исто така, машки производ (за волја на вистината и успешноста на капањата, се атакува само на мажите, занемарувајќи ја жената како корисник на производот).  Гордоста има улога морално да ве „скрши“, па почнувате да чувствувате социјален притисок и засраменост дека потфрлувате во процесот на „одржување на задоволството“ на вашето его пред самите вас и пред неформалните групи во вашата непосредна околина, преку купување на половен, стар и по default „расипан“ автомобил.

Додека поствесно размислувате дали можете да живеете со „срамот“ возејќи го стариот авотмобил во околина којашто го става на пиедестал новото, модерното и скапото (изразувајќи го токму преку предметите кои го одредуваат животниот стил и статусот во општествените класи), конечно почнувате да го осетувате последниот и најсуптилен апел. А тој ви нуди безрезервно пријателство и поддршка дека има кој да ви помогне во тешките случаи на таквата непријатна ситуација, во кое вашето его (теориски правилно - вашиот ид) бара социјално и емоционално задоволување, засилен со рационалната страна на техничкиот фактор – проблемот што ќе го имате со расипувањето на стариот автомобил.

Билбордов може да го даде својот посакуван резултат доколку имате малку повеќе парични средства со склоност кон трошење и ви значи вашиот углед во околината, а посебно доколку повеќе ве исполнува емоционалното задоволување отколку рационалното размислување – тогаш, вие веднаш можете да бидете зграпчени во оваа одлична маркетинг замка!

И за крај, можеме да дадеме само СИЛЕН АПЛАУЗ за овој одлично сработен билборд, вооружен со соодветни апели, кои сериозно можат да дадат ефект во новозатекнатата состојба на пазарот, каде положбата на нарачувачот е загрозена и истиот се обидува со маркетинг трикови да ги оствари своите продажни цели. 

Прочитај повеќе >>

comments

Мал, но збунувачки оглас на PEKO

Цело лето во весник го забележував овој краток и обичен оглас од Peko, а нејаснотиите околу него сеуште не ми се разјаснети. Иако е малечок и краток, во својата суштина, за мене, а верувам и за голем број читатели, тој може да биде комплициран и сложен, и да доведе до степен да ја претпоставуваме неговата поента.

Имено, огласов на Peko не е воопшто јасен во пораката што ја испраќа, иако таа е толку едноставна и разбирлива. Се прашувам што значи тоа -20% „неделен“ попуст : дали значи дека цените се намалени за „20% ОВАА ЦЕЛА НЕДЕЛА“ и секогаш кога ќе го видиме огласов во весник значи дека важи за „оваа недела“ односно „седмица - како збир од седум денови“?  Или поверојатно е дека попустот стапува на сила секоја „недела, како ден од седмицата – ден којшто следи после денот сабота“?!

Која и да е точноста на пораката, со нејзината нејасност и неразбирливост воопшто не се придонесува кон поттикнување на потрошувачите, туку напротив, кон нивно целосно збунување, што верувам води кон занемарување на огласот и пораката којашто всушност требаше да издејствува зголемена посета на „сите продавници на Peko низ Републиката“. 

Прочитај повеќе >>

comments

РЕКЛАМИРАЈ СЕ 24/7 се огласи со тотално неправилно напишан текст

Штом ги забележав клучните зборови „рекламирај се“ сметав дека дејноста на оваа страница спаѓа под мој интерес на анализирање и со посебно внимание ја проследив нејзината интернет презентација.  Набрзо, бев зачудена од овој неочекуван непрофесионализам.

За каква организација станува збор, можете да прочитате од објаснувањето на самиот настан, но без разлика колку и да е (не)сериозна или (не)професионална идејата или пак концептот за оваа веб или фејсбук страница, сепак тимот кој стој позади неа, требало да се потруди повеќе околу простото објаснување на нивната ,,мисија” на работење и постоење.

Судејќи по текстот кој е напишан без да има една точна реченица, конструкција, збор или пак интерпункциски знак на своето право место, или пак без да биде чисто естестки среден (дури и да е напишан од секојдневен просечен објавувач на интернет), можете да претпоставите каков тим стои позади РЕКЛАМИРАЈ СЕ 24/7: професионален и пендантен? -  Се сомневам. Доколку едно објаснување за обичен facebook event имаат тешкотија да го напишат како што треба и доликува, можете да замислите тогаш што ќе се случува со објавувањето на вашите реклами или која и да е друга работа што (ќе) ја извршуваат?!

Уште на почеток, на нивното лого можете да забележите чиста техничка грешка, но од толкувачки карактер. Логото (во случајот фразата ,,рекламирај се”) е прецртано, знак што во колективната меморија отсекогаш се перцепирал како забрана (нешто што се негира; нешто што е тука и не треба да биде повеќе; што со самото прецртување престанува да биде на сила и да постои;). Дали ,,тимот” имал некоја таква идеја да алудира на тоа дека рекламирањето ќе биде толку суптилно и прикриено, незабележливо и подмолно ефективно ќе ги вметнува рекламите во свеста на конзументите, или пак без многу размислување одбрале таков striketrought на фонтот, останува мистерија. J

…

После толку поминато време и (под претпоставка) успешно работење на Рекламирај се 24/7, како последица на временскиот јаз помеѓу пишувањето на овој текст и неговото објавување, решив да да ја отворам Рекламирај се 24/7 facebook страницата за да видам дали ги поправиле „печатните“ грешки кои ги сретнавме во дескрипцијата на нивниот настан. На наше големо разочарување и вчудоневидување, без никаква корекција е направено copy-paste на истиот текст, кој со идентични грешки, без никаква промена, гордо стои под секцијата description. Дури ни идното време не е заменето во сегашно (или минато свршено) па Рекламирај се 24/7 сеуште „започнува со работа“.

Дополнително коментирање не е потребно. 

Прочитај повеќе >>

comments

Перцепциска грешка во повикот на ТВ АЛФА за гледање вести

Случајно во очи ми падна статусот на ТВ Алфа, преку кој facebook тимот на телевизијата повикуваше на гледање на нивните вести. Не можев, а да не ја приметам погрешната конструкција во заповедната реченица која како да ми велеше „не ги гледајте нашите вести“.

Имено, во реченицата од facebook статусот, веднаш до заповедниот збор ,,гледајте” стои и заменската форма „НЕ“, која во македонскиот јазик во исто време е и НЕГАЦИЈА. Гледачот до кого е пратен овој апел може да добие потсвесно перцепирање на ,,не гледајте!” или ,,гледајте – не (никако)!” бидејќи зборот „не“ не е акцентиран. Посоодветна форма на оваа реченица би била целосно да се исклучи честичката „не“ за во ниту еден случај да не се прати негативна конотација на реченицата.

„Гледајте ги нашите вести во 17.30” или пак ,,гледајте Алфа Вести во 17.30” би била посоодветна, попријатна и понежна варијатна за да се повика еден facebook гледач пред малите телевизиски екрани за да ги проследи вестите.

Прочитај повеќе >>

comments

Технички и маркетинг грешки во малиот банер за ,,против семејното насилство”

Доколку го погледнете поубаво малиот банер кој долго време излегуваше во десната лента наменета за реклами на facebook, ќе можете да забележите голем број маркетинг и технички  грешки. Толку мал банер, а толку многу грешки. Да започнеме со нивното дефинирање:

1. Банерот започнува со „НЕ“ – негацијата која треба да му даде дискредитација на семејното насилство, и истата е во наводници. Колку и да е во случајов  граматички коректно да се стават наводници, од перцептивен аспект, може да алудира на стилска форма на иронизирање, алудирајќи токму на неговото спротивно дејство – ,,ДА”!


2. Кога веќе дизајнерите решиле да стават наводници барем да ги назначеле точно. Според македонскиот правопис наводниците ги означуваме со ,, “ (долни и горни наводници) – грешка којашто во банеров се повторува двапати.

3. Наредно, можеме да го забележиме создавањето на когнитивна дисонанца во двете прости и мали пораки кои имаат сосем спротивен исказ! Едната вели ,,НЕ за ...”, а другата вели ,,МОЖЕШ и ти!”. Едната парола забранува и негира, а другата поттикнува и мотивира. Без дополнителни објаснувања, перцептивно овие два ,,слогани” праќаат дијаметрално спротивна порака!

4. Како наредна, 4та грешка можеме да ја потенцираме несоодветно избраната слика. Доколку се работеше за голем рекламен банер, можеби сликава ќе беше соодветна, но во случајов ние не можеме да прочитаме за што е тоа што ,,И НИЕ МОЖЕМЕ”. Што од друга страна и не е маркетинг, туку техничка грешка, бидејќи таквата нејасна, невидлива порака може да поттикнува на дополнително отворање на банерот, со линкување до страницата – што всушност е целта на банерот.

5. Нејасно е објаснувањто на рекламата којашто вели ,,да се обединиме со цел да ги поттикнеме жртвите на семејно насилство да кажат НЕ”.  Покрај двата несоодветни слогани, сега имаме и сосем различно објаснување кое повикува на нешто сосем друго, односно прави хаос во поглед на таргетот кон кој е насочена оваа порака: кон 1) насилниците, 2) жртвите, 3) ,,сеирџиите“??? Дали насилниците треба да му кажат НЕ на насилството? Дали жртвите треба да се спротивстават на насилството? Или пак МОЖЕШ И  ТИ ги вклучува ,,гледачите” на истото?

6. Грешка од социјална природа. Статистички е докажано (дури и во нашата земја) дека во последно време се поголем број жртви од семејно насилство се и мажите! Зошто пораката зборува за жените-жртви и во буквална смисла стигматизира и дискриминира? Зарем не треба секој да биде заштитен од него, без разлика на полот или возраста? Каде се тука децата? Зарем ќе правиме посебни кампањи за жени, мажи и деца?  

Како заклучок, може да истакнеме дека се работи за мала, но хаосна реклама, без соодветна таргет група - во исто време насочена кон 3 сосема различни таргети, со 3 различни пароли - секоја спротивна на претходната.

Резултатот не’ води кон целосно банализирана, неприметлива реклама и без никаков ефект, за сложено и осетливо прашање какво што е семејното насилство – проблем за којшто е потребен целосен и детален пристап за сузбивање на истиот, наместо скромни facebook банерчиња.

Прочитај повеќе >>

comments